پردیس میں تبلیغ دین

کینیڈا وارد ہوئے مجھے تقریبا ایک ہفتہ گزرا تھا اور میں جیٹ لیگ کی کیفیت میں تھا۔ تما م دن اپارٹمنٹ میں اونگھتے اور رات جاگتے کٹتی تھی۔ انہی دنوں کی بات ہے کہ جب میں ایک دوپہر صوفہ پہ پڑا اونگھ رہا تھا کہ کسی نے بیرونی دروازہ پیٹنا شروع کر دیا۔ میزبان گھر پر موجود نہیں تھے اس لیے چارو نا چار مجھے ہی دروازہ کھولنا تھا۔ بڑی مشکل سے گرتے پڑتے دروازے تک پہنچے اور پِیپ ہول سےنظر دوڑائی۔ کیا دیکھتا ہوں کہ ایک لمبے تڑنگے ا فریقی النسل صاحب کھڑے دانت دکھا رہے ہیں۔ سوچا یہی وقت ہے اپنی انگریزی آزمانے کا۔ بس اپنے آپ کو کسی بھی غیر مانوس لہجے میں انگریزی دانی کے لیے تیار کرتے ہوے جھٹ سے دروازہ کھول ڈالا۔  دوسری طرف موصوف نے مجھے دیکھتے ہی کسی جناتی زبان میں گفتگو شروع کردی۔ پہلے تو سمجھ ہی نہ آسکی کہ یا الٰہی کیا ماجرا ہے، کہ ہماری انگریزی جیسی بھی ہے اتنی بُری بھی نہیں کہ کان پڑا کچھ سنائی ہی نہ دے۔ چند لمحے سر کھجانے کے بعد احساس ہوا کہ الفاظ جانے پہچانے سے ہیں۔ فوراً ہی یہ حقیقت آشکار ہوئی کہ موصوف پنجابی میں گفتگو فرما رہے ہیں۔ اور ساتھ کاندھے سے لٹکے بیگ میں سے کوئی پمفلٹ نکال کر مجھے تھمانے کی کوشش کرنے لگے۔ میں ٹکٹکی باندھے حیرت سے ان کے منہ کو دیکھتا رہا۔ موصوف یسوع مسیح کا کوئی پیغام امن پڑھارہے تھے۔ اپنی حیرت پہ قابو پاتے ہوئے میں نے عرض کی کہ جناب جو پمفلٹ آپ تھمانے کی کوشش میں ہیں وہ میرے لیے بے کار ہے  کہ یہ گُرومکھی رسم الخط میں ہے اور میں نہ تو Sick ہوں نہ ہی سکھ ہوں۔ نیز یہ کہ مرتد ہونے کا میرا دور دور تک کوئی ارادہ نہیں۔ آپ جائیں اپنا راستہ ناپیں۔ بجائے ہٹنے کے انھوں نے جھٹ سے ایک اور پمفلٹ اردو میں چھپا ہوا نکالا اور ساتھ ہی اردو میں واعظ شروع کردیا۔ اب تو میں ان کی صلاحیتوں کی داد دیے بغیر نہ رہ سکا۔ استفسار پر معلوم ہوا کہ موصوف کا تعلق کسی عیسائی مشنری سے ہے اور چھ سال امریکہ میں چرچ کے زیراہتمام کسی تعلیمی ادارے میں اردو، پنچابی اور ہندی سیکھتے رہے ہیں کہ ہم دیسیوں تک اپنی تبلیغ کرسکیں۔ اور نہ صرف یہ کہ اردو، پنجابی بلکہ اس ادارے میں درجنوں غیر ملکی زبانیں سکھانے کا بندوبست ہے جہاں سے فارغ لتحصیل طلبہ و طالبات غیر ملکی زبانیں سیکھ کر تبلیغ کے مشن پر روانہ ہوتے ہیں۔ پیغام سے قطع نظر ان کی کوشش اور جذبہ قابل قدر تھا۔ اور ساتھ ہی ساتھ حیرت ہو کہ کتنے بڑے پیمانے پر یہ کام جاری ہے۔

دوسری طرف رائے ونڈ پاکستان سے آئے کئی مبلغ حضرات سے مل چکا ہوں جن کی انگریزی کی ماڑی حالت دیکھ کر حیرت ہوتی تھی کہ تبلیغ تو درکنار یہ ہوائی اڈے سے یہاں تک کیسے پہنچے؟  معلوم ہوا کہ یہ حضرات صرف اردو، پنجابی سے ہی اپنا کام چلاتے ہیں اور دیسیوں کے علاوہ کسی اور کو اپنا پیغام پہنچانے کے لائق نہیں سمجھتے۔ عرب ممالک سے آئی تبلیغی جماعتوں کا حال بھی زیادہ مختلف نہیں، سوائے مغربی زبانوں میں اسلامی کتابیں چھپوانے کے کوئی قابل ذکر کام نہیں کیا گیا۔ باقی رہے دوسرے مسلمان، تو انہیں اپنی زندگی کی مصروفیات سے ہی فرصت نہیں، دین کی کسے پرواہ ہے۔ تو پھر سوال یہ پیدا ہوتا ہے کہ تبلیغ کا کام کیسے جاری ہے اور یہ جو تھوڑے بہت لوگ مسلمان ہو رہے ہیں تو اس کے پیچھے کیا اسرار ہے؟

تحقیق کرنے پر معلوم ہوا کہ وہ نو مسلمین کی یا تو اپنی کاوش تھی یا پھر کچھ اللہ لوگ انفرادی طور پر تبلیغ کا کام جاری رکھے ہوئے ہیں۔ ان نومسلمین نے کتابوں اور انٹرنیٹ سے معلومات حاصل کرنے کا آغاز اپنے تجسس کی خاطر کیا اور پھر گرتے پڑتے دل و دماغ کی کشمکش سے گزرتے ہوئے اسلام لانے کے فیصلہ کن نتیجہ پر پہنچے۔ ان نومسلمین کو اپنے معاشرے اور خاندان کی طرف سے جو مخالفت بھگتنی پڑتی ہے وہ تو اپنی جگہ، لیکن کئی ایسے مسائل کا سامنا بھی کرنا پڑتا ہے جس کی ذمہ داری بڑی حد تک ہم پیدائشی مسلمانوں پر ہے۔ مثال کہ طور پر ہم لوگ پبلک ریلیشننگ میں کافی کمزور واقع ہوئے ہیں۔ تقریباٍ پچانوے فیصد مساجِد اور اسلامی تنظیموں کی ویب سائٹس نہ تو باقاعدگی سے اپ ڈیٹ رکھی جاتی ہیں اور نہ ہی ان پر غیر مسلم مقامی آبادی سے رابطے کا کوئی مؤثر ذریعہ(Outreach Program) ہے۔ ویب سائٹس پر شائع کی گئی ای میل کے پتے پر میل بھیجیں تو کئی کئی ہفتے جواب ہی نہیں آتا۔ فون کرو تو اول تو کو ئی اٹھاتا ہی نہیں، اور اگر بفرض محال کوئی اٹھا لے تو عموما ایسے شخص سے پالا پڑتا ہے کہ تمام وقت ان کی انگریزی سمجھتے اور اپنی سمجھاتے گزر جاتا ہے۔ میں ایک ایسی نو مسلم خاتون سے واقف ہوں جو اپنی قریبی مسجد سے رابطہ کرنے پرصحیح اور مثبت جواب نہ ملنے پر مایوس ہو چکی تھیں۔ آخر انھیں کئی ماہ بعد ا یک نزدیکی شہر کی مسجد کا رخ کرنا پڑا۔ تبدیلی مذہب کے سلسلے میں اور کیا حالات پیش آسکتے ہیں اس کا اندازہ آپ صفیہ جو کہ یہودی النسل ہیں کے قبول اسلام کے واقعہ سے لگا سکتے ہیں۔

تبلیغ کا جو طریقہ رسول کریمﷺ کی سنت سے ثابت ہے اس میں اعلیٰ کردار، اخلاق، عمل اور دلیل شرط ہے۔ پہلی تین خصوصیات تو ہم میں باقی رہی نہیں، اور دلیل کا موقعہ ہم ناسمجھی اور جذبات کی رو میں بہہ کر گنوا دیتے ہیں۔ واضح رہے کہ بات مسلمانوں کی تعداد بڑھانے کی نہیں بلکہ اسلام اور مسلمانوں کا دفاع اور صحیح تصویر پیش کرنے کی ہے۔ یا تو ہم اپنی ذمہ داری کا احساس کرتے ہو اپنا کام سلیقہ سے نبٹائیں ورنہ غیر نمائندہ افراد کی طرف سے مسلمانوں کی کردار کشی اور اسلام کے بارے میں بدفہمی پھیلانے کا سلسلہ یونہی جاری رہے گا۔