بوالعجیبیاں

بلاگراعظم کو پردیس آئے بہت برس گذر چکے ہیں۔ جب سے آیا ہے کبھی واپس جانے کا اتفاق نہیں ہوا۔ وجہ یہی ہے کہ تمام مصروفیات اور کاروبار زندگی ادھر کینیڈا ہی سے جڑا ہے۔ تمام خاندان یہیں ہے۔ واپس جانے کی کوئی وجہ نہیں تو جانا کیا۔

کتنے برس ہوگئے؟

اسے چھوڑو۔ بس یوں سمجھو کہ جب آیا تھا تو آنڈے اٹھارہ روپے درجن ، ڈبل روٹی گیارہ روپے کی ، اور ودیا قسم کا چاول بھی چھتیس روپے کلو میں مل جاتا تھا۔ سیانے کا کہنا ہے کہ اب ان قیمتوں کے آخر میں ایک اور آنڈے۔۔۔بولے تو۔۔۔صفر کا اضافہ کر لو۔ بلاگراعظم اپنی اسی بےخبری کی وجہ سے پاکستان کے لمحہ بہ لمحہ بدلتے حالات پر پرمغز بیان دینے سے قاصر رہتا ہے۔

سیاست پر پوسٹیں؟

کیوں کروں؟ ادھر ہزاروں میل دور ٹورنٹو میں بیٹھ کر مجھے پاکستان کی سیاسی ذلالت سے کیا لینا دینا؟ جن لوگوں کا مستقبل اس سے جُڑا ہے صرف وہی جانیں۔ وہ بی بی۔۔۔ایکسکیوزمی۔۔۔ "شہید" بی بی پالٹی کو ووٹ دیں یا بھگوڑا لیگ کو۔ جذباتی نوجوان کے پیچھے لگیں یا مستقل قومی مشکل کو جپھا ماریں۔ مجلس المنافقون کے ہاتھ بعیت کریں یا طالبان کے کت خانہ پر منہ صاف کریں۔ سانوں کی؟؟

ادھر سیانے کی اپنی ہی چول ہے۔ کہتا ہے کہ اگر اردو میں ٹک ٹک کرنے کا چا پورا ہوچکا ہے تو انگریزی بلاگ پر واپس آجاؤ۔ کہ بلاگستان میں پنپنے کے لئے ضروری ہے کہ بندہ سیاست اور مذہب دونوں کو رگیدتا رہے۔

پاکستانی ذلاست سے بیزاری تو بتا دی۔

رہ گیا مذہب تو میرے "مرتد" ہونے کا انکشاف مومنین بلاگستان پر پہلے ہی واضح ہے۔

اُدھر سیانے کا حساب کتاب بتاتا ہے کہ بلاگر اعظم کے نارے وجنا ناممکن ہے۔ تاہم اگر یک بلاگہ پالٹی بنانی ہے تو الگ بات ہے۔

لیکن۔۔۔

بلاگراعظم صرف بلاگراعظم ہی نہیں۔۔۔ پھپھڑ بلاگستان بھی تو ہے۔

لہذا بلاگراعظم نے اپنے اعلیٰ سیاسی شعور کا ثبوت دیتے ہوئے اپنے مشیر سیانیات کو عہدے سے برخاست کردیا ہے۔ اور اس کی جگہ خدمات حاصل کی ہیں ایک کنسلٹنٹ کی جسے کراچی کی سڑکوں پر آدھی صدی قبل سو گھنٹے سکوٹر چلانے کا وسیع تجربہ ہے۔

کنسلٹنٹ نے کچھ حساب کتاب کرکے ایک کھاتہ تیار کیا ہے۔ جو بتاتا ہے کہ کتنی لاشیں کس پالٹی کی طرف نکلتی ہیں۔ لیکن بلاگر اعظم کو شک ہے کہ اس میں وہ شہید بھی شامل ہیں جو کنسلٹنٹ کے اپنے سکوٹر تھلے آچکے ہیں۔

قارئین کرام۔۔

بلاگر اعظم کی سمجھ میں کچھ نہ آوے ہے۔

بلاگراعظم جس شہر کا باسی ہے وہاں مختلف رنگ و نسل ، مذاہب ، اور قومیت کی تقریبا ڈیڑھ سو سے زائد قومیں آباد ہیں۔ اور اس شہر میں عصبیت کا شکار اگر کوئی ہوا ہے تو شائد ستر برس پہلے ہوا ہے۔ جب کسی ایک قومیت والے نے دوسرے قومیت والے کوایک چماٹ اور دوگھسن مارے تھے۔ پھر کبھی ایسا واقعہ رونما نہیں ہوا کہ امن کی دیوی ان ناپاک لوگاں کو نپ کے رکھتی ہے۔

اُدھر برخاست کیا گیا سیانا جان نہیں چھوڑتا۔ کہتا ہے کہ نقص امن کی گڑھتی پاک لوگاں کی "پاکیزگی" میں ہے۔ اور پاکیزگی سے تیرا کیا لینا دینا؟ تو اسے چھوڑ اور سیلاب زدگان پر ایک دلخراش پوسٹ لگا۔

کنسلٹنٹ کہتا ہے کہ نہیں۔ سیلاب زدگان پر تو وہاں کے لوگ نہیں لکھتے۔۔۔تو تمہیں کیوں موت پڑی ہے؟ اور تمھیں کیا گھنٹہ درد ہوتا ہے؟ شوق پورا کرنا ہے تو کوئی اخباری لنک لگا دو۔ یا پھر یہ سمجھو کہ پاک لوگ سیلاب میں نہائیاں کر رہے ہیں۔

نہائیاں سے یاد آیا کہ ادھر ٹورنٹو میں بھی بڑی گرمی ہے۔ لیک اونٹاریو کے ساحل پر میموں نے انت پائی ہوگی۔

میں تو چلا۔۔۔

کل پھر صبح ہوگی۔