(۱) فہم دین

لاہور کے جس علاقے سے میرا تعلق ہے وہاں قریب ہی تنظیم دعوت اسلامی والوں کی مسجد ہے جسے عرف عام میں "بڑی مسجد" کہا جاتا ہے۔ تنظیم دعوت اسلامی کے اراکین ہروقت ہرے رنگ کی مخصوص پگڑیاں پہننے کے سبب "ہری پگڑی والے" کی عرفیت سے جانے جاتے ہیں۔ سر پر ہرے رنگ کی پگڑی ، گردن سے نیچے آتے تیل لگے بال ، سفید رنگ کا کرتا اور شلوار، شلوار ٹخنوں سے کئی انچ اونچی اور پاؤں میں کھلی چپل۔ یہ اُن کی تصور کردہ شریعت کے مطابق "اسلامی لباس" ہے۔ یوں تو ہری پگڑیوں والے تمام ہفتہ اس شرعی لباس میں ملبوس دکھائی دیتے ہیں لیکن جمعرات کی رات بڑی مسجد میں ہفتہ وار اجلاس کے انعقاد کے سبب سوڈیوال مین بازار ان کا رش لگا رہتا ہے۔۔۔ جہاں وہ سڑک پر سٹال لگا کر اپنا جماعتی لٹریچر بانٹنے کے ساتھ ساتھ تبلیغ دین کرتے دکھائی دیتے ہیں۔ مجھے عموما رات کو تندور کی روٹیاں لینے کی عادت تھی۔ لیکن جمعرات کی رات میں سڑک پر موجود تندور پر جانے سے کتراتا تھا۔ وجہ یہ تھی کہ کلین شیو ہونے اور ٹراؤزر پہننے کی سبب مجھے لیکچر سننا پڑتا کہ یہودیوں اور عیسائیوں کا لباس ترک کرکے اسلامی وضع قطع اختیار کی جائے۔ گرمیوں میں تو اور بھی مصیبت ہوتی جب میں نے نیکر پہنی ہوتی۔ باوجود اس کے کہ نیکر گھٹنوں سے نیچے تھی۔ تبلیغ کے دوران دلچسپ قسم کے "دلائل" سننے کو ملتے۔ جس میں سب سے دلچسپ شانوں پر لٹکتے بالوں کی فضیلت تھی۔ کہ کس طرح کسی "حدیث شریف" کی رو سے کاندھے پر لٹکتے ہر ایک بال پر ہزار ہزار نیکیاں ملیں گی۔چہرے پر داڑھی اور اونچی شلوار تو ان کے نزدیک فرض تھی۔ جبکہ سبزپگڑی اور لمبے تیل لگے بال واجب۔ باقی ہر حلیہ فاسق تھا۔ بھلے آپ نے سادہ شلوار قمیض ہی کیوں نہ زیب تن کی ہو۔ محلے کے لڑکوں کے لئے اصل سزا یہ تبلیغ نہ تھی بلکہ اگلے دن گلی کے کونوں کھردروں سے اٹھنے والا وہ تعفن تھا جو مسجد کی لیٹرین محدود ہونے کے سبب ہماری گلیوں میں موجود ہوتا تھا۔ اگلے دن کرکٹ کھیلتے وقت ہم لوگ خیال رکھتے کہ گیند گلی کے کونوں ، پودوں کی کیاری اور دیوار کے کناروں پر نہ چلی جائے ورنہ گندی ہوجائے گی۔

دین کی اصل فہم فراست اور روح کو پس پشت ڈال کر سطحی تاویلات گھڑنے اور ظاہری عناصر پر شدومد کے ساتھ اصرار کرنے والے ان مومنین کے ساتھ میں نے اپنے بچپن اور لڑکپن کے کئی برس گزارے۔ اس وقت چوں کہ صرف یہی "اسلامی معاشرہ" دیکھا تھا اسی لئے اسی کو صحیح جانتے تھے۔ بھلا ہوسکتا ہے کہ ایک آدمی نے بسم اللہ پڑھی ، آیت سنائی ، حدیثیں بیان کیں۔۔۔اماموں کے قصے سنائے اور غلط ہو سکا؟؟ ایسی باتیں تو الف سے ے تک ٹھیک ہوتی تھی ورنہ ایمان جانے کا اندیشہ تھا۔ حدیث سنائی گئی۔۔آیت بیان کی گئی۔۔۔ذہن مائل ہو نہ ہو بس ایمان لے آؤ ورنہ۔۔ورنہ گئے کام سے۔ فل سٹاپ ، پیریڈ۔۔مکو ٹھپ!!

جب میں پردیس آیا تو صورتحال مختلف تھی۔ اول تو مذہب کے متعلق یہاں زیادہ بات نہیں ہوتی۔ لیکن اگر ذاتی دلچسپی ، تبلیغ اور اسلام کے خلاف غلط تصورات کے رفع کرنے کی سعی میں مذہب پر بات ہوبھی جائے تو محض حدیث اور آیت سنانے سے گذارا نہیں ہوتا کہ اس حقیقت پسندانہ لیکن ملحدانہ کافر معاشرے میں بات صرف اور صرف دلیل اور عقلی استدلال سے کرنی پڑتی ہے۔ آپ نے آیت سنادی۔۔اچھی بات ہے۔ لیکن ایک غیر مسلم کے لئے یہ کوئی معنی نہیں رکھتی جب تک بیان کی گئی حکمت استدلال سے ثابت نہ کی جائے۔ اور اگر دعویٰ ہو کہ آپ کا دین واحد دین فطرت ہے تو معاملہ اور بھی حساس ہوجاتا ہے کہ بیان کی گئی بات منطق اور فطرت پر ثابت کرکے دکھاؤ۔ اور یہ وہ مقام ہے جہاں "مستند مدرسوں" کے "سند یافتہ" میں نے جان چھڑاتے دیکھے ہیں۔۔۔ کہ رٹا اور فکر میں آگ اور پانی ایسا تضاد ہے۔ پاکستانی مساجد جنہوں نے غیرمسلموں میں تبلیغ کا آج تک کوئی کام انجام نہیں دیا۔۔۔ان سے جان چھڑا کر کچھ دوسرے "فاسق" لوگوں سے تعلق جوڑا جن کا بنیادی سبق یہ تھا۔۔۔کہ کچھ نہیں بننے لگا جب تک مطالعہ (اور مطالعہ دین) کے دوران اپنے آپ سے تنقیدی سوالات نہ پوچھو۔ اس کوشش میں مجھے دو فائدے ہوئے۔ ایک تو یہ کہ دین کی وہ بہت سی باتیں جن پر میں محض خوف اور بچپن میں سنی سنائی ہونے کی وجہ سے یقین رکھتا تھا۔۔ان پر ذہنی اور عقلی طور پر بھی ایمان لے آیا۔ دوسرا یہ کہ جب بحث کے دوران غیرمسلم سے واسطہ پڑتا تو محض سنی سنائی سنانے کے علاوہ بھی میرے پاس کچھ نا کچھ کہنے کو ہوتا۔ کم از کم قرآن کے بارے بحث کرتے وقت مجھے بہت کم پریشانی کا سامنا کرنا پڑا۔ ہربات منطقی استدلال سے کرتے ہوئے گرتے پڑے کہیں تک پہنچا ہی لیتا۔ حدیث کا معاملہ البتہ مختلف ہے۔ ان میں سب سے دلچسپ میری ایک ملحد کے ساتھ مسئلہ تقدیر پر بحث تھی۔ جی وہی مسئلہ تقدیر جس پر سوچنا بھی "گناہ" ہے۔ عالم تو نہ بن سکا لیکن اندھے اعتقاد کی رِیت سے بھی جان چھوٹ گئی۔

اپنی محدود اور ناقص فہم و فراست سے میں یہ کسی حد تک جاننے میں کامیاب ہوا کہ اسلام ایک تہذیب ایک کلچر یا زندگی گزارنے کا پیکج نہیں بلکہ انفرادیت اور معاشرت کے کچھ بنیادی ستون اور اصول مہیا کرتا ہے۔ اسلام آفاقی تہذیب نہیں بلکہ آفاقی دین ہے۔ اس کو ایک تہذیب میں مقید کرنا اس کی توہین ہے۔ اسلام جس معاشرت ، جس تہذیب ، جس جغرافیے اور جس قوم میں جائے گا وہاں سے کچھ غلط چیزیں نکال پھینکے گا، کچھ نیا اور مثبت لے کر آئے گا اور کچھ بے ضرر جوں کا توں رہنے دے گا۔ جب عرب میں آئے گا تو عربی اسلامی معاشرہ قائم کرے گا۔ ہندوستان میں آئے گا تو ہندوستانی اسلامی معاشرہ اور اس طرح چین جاپان ، افریقہ اور مغرب۔۔۔جی ہاں وہی فاسق اور فاجر مغرب میں جائے گاتو بالترتیب چینی ، چاپانی ، افریقی اور مغربی اسلامی معاشرہ قائم کرے گا۔ اسلام کا مقصد درج بالا معاشروں کی تہذیب اور معاشرت کو تلف کرنا ہرگز نہیں ہے۔ بلکہ کچھ آفاقی اصولوں کے مطابق ایک حد تک مثبت تبدیلی لانا ہے۔ یہ تبدیلی لوگوں کے باطن اور معاشرت میں دکھائی دے گی۔ پاکستانی ، عرب ، چینی ، افریقی اور مغربی مسلمان بہت سے باتوں اور کاموں میں مماثلت رکھنے کے باوجود یکساں تہذیب کے حامل نہیں ہوں گے۔ تہذیب ، زبان ، سماج اور فطرت میں تغیر خدا کی نشانیاں ہیں۔

جب برطانیہ کا ایک انگریز اسلام قبول کرے گا تو وہ "غیر انگریز" نہیں بن جائے گا۔ بے حیا بے تہذیب لباس سے جان ضرور چھڑائے گا۔۔۔انگریزی لباس سے نہیں۔ اپنا ستر ڈھاپنے گا۔۔۔اور زمانے، موسم حغرافیے اور موجودہ تہذیب کے لحاظ سے مہذب لباس زیب تن کرے گا۔ اس کا غیر مسلم انگریزوں سے ظاہری انفرادیت میں فرق یہیں تک معمور ہوگا۔ باقی انفرادیت اس کے باطن سے نمودار ہوگی۔ جینز اور جوگر سے جان چھڑا کر تہمد ، کھلی چپل اور پگڑی پہننا محض اس لئے اس پر فرض نہیں کہ عرب صحراؤں اور پاکستان کے دیہاتوں میں لوگ یہ "اسلامی لباس" زیب تن کرتے ہیں۔ انگریز کا انگریزی اسلامی معاشرہ مختلف ہوگا۔ پاکستان اور صحرائے عرب کے مسلمانوں سے بھی اور برطانیہ کے غیر مسلم گوروں سے بھی۔ انگریز کا جینز اور جوگر پہننا اس کا اسلام سے "اظہار بیزاری" یا عالم کفر سے "اظہار وابستگی" نہیں۔ بلکل اسی طرح جس طرح ایک پاکستانی کا تہمد اور جبہ کی بجائے شلوار قمیض اور کرتا پاجامہ پہنا کفر سے اظہار وابستگی نہیں۔اسوہ حسنہ شمائل نبوی پر منحصر نہیں۔ رسول اللہ کی وضع قطع اپنے زمانے، علاقے اور موسم کے اعتبار سے مخصوص تھی۔ تہمد ، کرتا ، پگڑی صرف رسول اللہ ﷺ اور صحابہ ہی نہیں قریش کے کافر بھی پہنتے تھے۔ صحرائے عرب کا موسم سرد ہوتا تو لباس اتنا ہی مہذب لیکن مختلف ہوتا۔ دین مین تقویٰ کا عظیم تصور لباس سے منسلک کردینا فدوی کی ناقص رائے میں انتہا درجے کی سطحیت ہے۔

"اسلام بمقابلہ مغرب" کا تصور کچھ اسلام بیزار طاقتوں کی طرف سے آیا ہے۔ جو اسلام کو اپنی نفرت اور جہالت کی بنا پر ایک کلٹ یا قبیلہ سمجھتے ہیں۔ افسوس ناک امر ہے کہ ہمارے مسلمان لاشعوری اور نادانی میں آکر یہ اصطلاح استعمال کرتے ہوئے اپنا ردعمل دکھا بیٹھتے ہیں۔ یہ کرتے ہوئے وہ یہ نہیں دیکھتے کہ اسلام کو ایک آفاقی دین سے گرا کر محض ایک تہذیب کے تقابل پر لا رہے ہیں۔ اسلام دنیا کی تہذیبوں کے اندر سرایت کرجانے اور اس کے ضروری حصوں کو ایک مخصوص سانچے میں ڈھالنے کی صلاحیت رکھتا ہے۔