کتاب بیزاری۔۔۔۱

''سعودی عرب اور سوڈان۔۔۔دونوں ممالک میں تقریبا دس برس گذارے ہیں۔ رشتہ داروں ، ملنے والوں اور معاشرے کے عام افرادکے بارے میں میرا مشاہدہ ہے کہ مسلمانوں کو مطالعہ سے کوئی دلچسپی نہیں۔ سعودی عرب میں بک سٹور ڈھونڈے نہیں ملتا۔ جہاں جاؤ وہاں معقول کتابوں کا انتہائی فقدان ہے۔ بچوں کے لئے کچھ کتابیں ہیں یا اسلامی کتابیں۔ لائبریری ہو یا بک سٹور۔ کتاب کا تصور وہاں ان دو موضوعات تک محدود ہے۔ میں نے اپنے کسی ملنے والے کے ہاں ہوم لائبریری تو کُجا۔۔کتابوں سے بھری شیلف تک نہیں دیکھی۔ بس جو کچھ ہے وہ مذہب ہی پر ہے۔ سوڈان میں صورتحال اس سے بھی بدتر ہے۔ میرا خیال ہے کہ مسلمانوں کے ہاں ناصرف یہ کہ مطالعہ سے بیزاری پائی جاتی ہے بلکہ یہ صرف اپنے مذہب پر مبنی "علم" کو ہی "علم" سمجھتے ہیں۔۔۔''
یہ مشاہدات اور ان سے اخذ کردہ متنازعہ نتائج ہیں میری ایک واقف کار کے۔ جو مشرق وسطیٰ میں کچھ عرصہ قیام کر چکی ہیں۔ موصوفہ کی پوری کوشش تھی کہ مسلمانوں کی اس کتاب بیزاری کو کسی طرح جرنلائز کرکے جدید اسلامی تہذیب کو ایک نچلی تہذیب ثابت کیا جائے۔ اس سلسلے میں انھیں میری رائے درکار تھی۔ اب سعودی عرب اور سوڈانی معاشرے سے میری تو کوئی واقفیت نہیں۔ البتہ یہ انکشاف مجھ پر ضرور ہوا کہ وہ واقعی ہمارے بھائی بند ہیں۔ انھیں تو کسی طرح بات گھما پھرا کر ٹال دیا لیکن خود سوچتا رہا کہ اس مسئلے کی کیا وجوہات ہیں؟ اور یہ مسئلہ کتنا سنجیدہ ہے؟
جب میں پاکستان میں تھا تو اس وقت لگ بھگ تین سو صفحات پر مشتمل کتاب ڈھائی تین سور روپے میں مل جاتی تھی۔ ڈھائی تین سو روپے تو خاصی رقم تھی خاص طور پر ایک طالبعلم کے لئے۔ پھر اگر اتنے روپے ہوں بھی تو دل نہیں کرتا تھا کہ یہ سب محض ایک کتاب پر صرف کردیے جائیں۔ کہ تفریحی ترجیحات میں کتاب سب سے نیچے آتی تھی۔ پیسہ اڑانے ، تفریح کرنے ، لطف طبع اور وقت گزاری کے لئے اور بہت سی ترجیحات تھیں۔ پاکستان میں جب تک تھا۔ تمام تر مطالعہ اخبارات، ڈائجسٹ ، عامیانہ قسم کے جاسوسی ناولوں یا بہت ہوگیا۔۔۔ تو تارڑ اور یوسفی وغیرہ کی کتابیں مانگ تانگ کر پڑھ لیں۔ اور ہاں۔۔۔اچھا مسلمان بننے کے لئے اسلامی کتب بھی تو ہیں۔ باقی بچے دوسرے خشک موضوعات مثلاً سائنس ، فلسفہ ، سماج اور نفسیات وغیرہ تو اس بارے یہی فیصلہ نہ ہوسکا کہ یہ پڑھنا آیا تفریح ہے یا سزا۔

یہاں ذرا ہر خواندہ شخص اپنے آپ سے اس بارے میں کچھ سوال کرے۔

آخری دفعہ کوئی کتاب کب پڑھی تھی؟

کونسی؟۔۔کس موضوع پر؟

آخری دفعہ کتاب کب خریدی؟ ۔۔۔

نصابی کتب کے علاوہ کوئی اور کتاب کبھی خریدنے کا اتفاق ہوا؟۔

کالج یونیورسٹی کے کاموں سے ہٹ کر کبھی لائبریری کا منہ دیکھا؟


معدودے چند فیصد افراد ( یہ چند فیصد بھی رعایتاً کہہ رہا ہوں) کے سوا اکثریت کی حالت میرے مماثل ہوگی۔ پروفیسر پرویز ہود بھائی نے اپنے ایک کالم بڑے چشم کشا حقائق بیان کیے تھے۔ انھوں نے اسی سے ملتے جلتے سوالات قائد اعظم یونیورسٹی میں ایم ایس سی فزکس میں داخلے کے خواہش مند طلبہ کے سامنے رکھے۔ ہود بھائی کا بیان تھا کہ بہت بڑی اکثریت ڈائجسٹ ، جاسوسی ادب، عامیانہ عشقیہ ناول اور مذہب پر مبنی کتب سے ہی شغف رکھتی تھی۔ نا کبھی کسی کو نصابی سرگرمیوں سے ہٹ کر لائبریری کا منہ دیکھنے کا اتفاق ہوا۔ نا کبھی رقم خرچ کرکے کسی سنجیدہ موضوع پر کوئی سنجیدہ کتاب خریدی یا پڑھی۔ اکثریت مذہبی کتب کو ہی ترجیح دینے اور پسندیدہ کتب کہنے پر مائل تھی۔ حتیٰ کہ جس مضمون میں ایم ایس سی کے خواہشمند تھے۔ اس پر بھی کبھی نصابی کتب سے ہٹ کر کچھ نہ پڑھا تھا۔ پاکستان کے ایک اعلیٰ ترین تعلیمی ادارے کے طلبہ کی یہ حالت بڑے تاریک معاشرتی پہلو بے نقاب کرتی ہے۔
پاکستان کی ساٹھ سے ستر فیصد آبادی ناخواندہ افراد پر مشتمل ہے۔ یہ لوگ تو یوں گئے۔ باقی رہے تیس سے چالیس فیصد خواندہ۔ اس خواندہ آبادی پر بھی ناخواندہ کلچر کی چھاپ ہے۔ معلوم ہوتا ہے کہ جسطرح اگر اکثریتی آبادی خواندہ ہو تو وہ ''Culture of Literacy" پیدا کرتی ہے اسی طرح گر اکثریتی آبادی ناخواندہ ہو تو وہ مجموعی طور پر "Culture of Illiteracy'' پیدا کرتی ہے۔ مطالعہ سے بیزاری کا کُھرا بھی شائد یہیں جا نکلتا ہے۔ خواندہ آبادی میں ناخواندگی کے کلچر کی ایک سے زائد وجوہات ہیں۔ نظام تعلیم ان میں شائد سرفہرست ہے۔ اس نظام تعلیم میں سوچ اور تحقیق کا انتہائی فقدان ہے۔ تمام تر توجہ صرف نصابی کتب تک ہی محدود ہے۔ مطالعہ برائے مطالعہ اور علم برائے علم کا کوئی تصور نہیں۔ تعلیمی اداروں میں پڑھائی امتحانی نقطہ نظر سے پڑھائی جاتی ہے اور پڑھی جاتی ہے۔ اس سے آپ دیے گئے مواد سے تو واقفیت حاصل کرلیتے ہیں۔ لیکن خود سے جاننے کی کوئی صلاحیت باقی نہیں رہتی۔ آپ کو ایک چیز دی گئی۔ آپ نے پڑھا۔ اور من و عن تسلیم کرلیا۔ کیا؟ کیوں؟ کیسے؟ یہ سوال وجود نہیں رکھتے۔ گورنمٹ کالج لاہور۔۔۔لاہور کا بہترین سرکاری کالج۔۔۔ جہاں پڑھنے کا میرا ذاتی تجربہ ہے۔ وہاں کی پتلی حالت کا تو میں خود شاہد ہوں۔
سمیسٹر کے آغاز میں آپ کو حوالہ کے لئے تین چار کتب بتائی جاتیں۔ لیکن عملی طور پر ان میں سے صرف ایک دیسی کتاب کا انتخاب کرکے تمام تر کام اسی سے کروایا جاتا۔ ہر بندے کو پتا ہوتا کہ جو کچھ کورس ورک دیا جائے گا۔ اور جو کچھ امتحان میں آنا ہے۔ اس تمام کی ضرورت بڑی حد تک یہ ایک کتاب ہی پورا کرے گی۔ لائبریری اور انٹرنیٹ سے کچھ مواد ازراہ تکلف بتا دیا جاتا۔ لیکن عملی طور پر اسے پڑھنے کی کوئی ترغیب تھی نہ ضرورت۔ کسی نے اپنے شوق کی خاطر اِدھر اُدھر منہ ماری کرلی تو کرلی۔ ورنہ کوئی ٹینشن نہیں۔ گویا امتحان میں کیا آنا ہے۔ اور اسائنمنٹس میں کن چیزوں کی ضرورت ہے۔اپنی توجہ بس یہیں تک ہے۔ اس نادر نظام سے کچھ دلچسپ شاخسانے برآمد ہوئے۔ کالج میں تین لائبریریاں تھیں۔ ان تمام لائبریریوں میں مقبولیت کا مرکز تین چار چیزیں ہی تھیں۔ کمپیوٹر ، اخبارات ، اردو ادب اور اسلامی کتابیں۔ دوسرے شعبہ جات میں موجود کتابوں کی گردش بہت کم تھی۔ اگر کوئی کتاب وزنی ہے۔ تو اس کے صفحات آپ کو جڑے ہوئے اور چپکے ہوئے ملیں گے۔ مطلب کہ لوگ وزن دیکھ کر ہی نہ پڑھنے کا فیصلہ کرتے تھے۔ مجھے یاد ہے کہ کچھ ہم جماعتوں کے ساتھ میری شرط تھی کہ کون ایسی کتاب اٹھا کر لائے گا جسے ایشو کیے ایک لمبا عرصہ گزر چکا ہوگا۔ اس عرصے میں جن ساتھی نے یہ دلچسپ ریکارڈ قائم کیا وہ فاتحانہ انداز میں ایک ایسی کتاب لے کر آئے تھے جسے آخری دفعہ جاری ہوئے چوبیس سال گذر چکے تھے۔ کتاب کے نئے ایڈیشن موجود تھے جو حسب توقع چپکے ہوئے صفحات کے ساتھ تھے۔ کتاب اگرچہ اپنے شعبہ میں مستند تھی۔ ایم فل کے طلبہ کی حالت نسبتاً بہتر تھی۔ اگرچہ تحقیق رسائل سے ان کی واقفیت ہماری ریفرنس کتب سے شغف کے مماثل ہی تھی۔ ان کی دگرگوں حالت کا اندازہ تو خیر مجھے باہر آکر ہی ہوا۔۔۔ (جاری ہے)