بلاگ، بلاگر اور بلاگنگ پر تبصرہ

ِ بنیادی طور پر بلاگرز کی تین اقسام ہیں۔ پہلی وہ جو شاندار اور بامقصد لکھتے ہیں۔ دوسرے وہ جو بس اچھا لکھتے ہیں۔ اور تیسری قسم وہ ہے جو "لکھتے" ہیں اور ایسا "لکھتے" ہیں کہ قاری بے اختیار پکار اُٹھتا ہے کہ اللہ کی شان۔۔۔ یہ بھی لکھتے ہیں؟ یہ تیسری ہی دراصل وہ قسم ہے جس کو دیکھ کر ہم نے بھی لکھنا شروع کیا۔۔۔ کہ جو کچھ یہ لکھ رہے ہیں وہ تو ہم بھی لکھ سکتے ہیں۔

انگریزی بلاگستان میں لکھنے والوں کی تعداد لاکھوں میں ہے اور تمام بلاگستان کو آپ کُلی طور پر ان تین ہی اقسام میں تقسیم کر سکتے ہیں۔ پہلی قسم یعنی شاندار لکھنے والوں میں وہ تمام بہترین تحقیق سے لے کر بہترین تحریر تک لکھنے والے ہیں۔ ان لوگوں نے اپنا کوئی نہ کوئی مشن اپنا رکھا ہے۔ اور اس مقصد اورمشن کی خاطر اپنے بلاگ کے ذریعہ اچھی خاصی جان مار رہے ہیں۔ میں نے ان میں یونیورسٹیوں کے پروفیسر اور اعلٰی پائے کے محقق دیکھے ہیں۔ ایک بڑا مشہور بلاگ   What's New کے نام سے میں کئی ماہ تک پڑھتا رہا ہوں۔ لکھنے والے یونیورسٹی آف کیلی فورنیا (لاس اینجلس) کے ریاضی کے مشہور پروفیسر ٹیرینس تاؤ ہیں جو ٢٠٠٦ میں ریا ضی کا "نوبل انعام" فیلڈز میڈل لے چکے ہیں۔ اپنے بلاگ کے ذریعہ دنیا بھر کے ریاضی کے طلبہ اور محققین کو اپنی تازہ ترین تحقیق اور ریاضی میں جدید اور پیچیدہ مسائل سے آگاہ رکھے ہوئے ہیں۔ اس قسم کے بلاگز کی اہمیت و افادیت کا اندازہ اس بات سے لگایا جاسکتا ہے کہ کیمبرج یونیورسٹی کے پرو فیسر ٹِم گاورز بذریعہ بلاگ ریاضی کی ایک پیچیدہ تحقیق مکمل کرچکے ہیں۔ (ریاضی کی زبان میں اسے Open Question Solve کرنا یا Theorem prove کرنا کہتے ہیں)۔مسئلہ اتنا پیچیدہ تھا کہ دو تٰین محققین کی متفقہ کوشش (Collaborative Research)  کے ذریعہ بھی حل نہیں ہو پا رہا تھا۔ آخریہ خیال پیش کیا گیا کہ کیوں نہ اسے بلاگ کے ذریعہ دنیا بھر کے محققین کے سامنے رکھا جائے؟۔۔۔ تو بس جناب وہ مسئلہ جو ایک عشرہ سے حل طلب تھا صرف چار ماہ میں دنیا کے کئی ممالک سے تعلق رکھنے والے درجنوں طلبہ اور محققین کی متفقہ کاوشوں سے حل کر لیا گیا۔ یہ تجربہ اتنا کامیاب رہا کہ اسے پیشہ ورانہ بنیادوں پر باقاعدہ ایک منصوبے کی شکل دے دی گئی۔ اب حال یہ ہے کہ ایسے کئی بلاگ اور ہوسٹنگ سائٹس موجود ہیں جو کل وقتی اسی کام میں مصروف ہیں۔ ان میں جدت لا کر کئی فیچرز شامل کردیے گئے ہیں تاکہ متعلقہ کام میں سہولت رہے۔ ایک  عام آدمی کے لئے ان تحقیقی بلاگز کو پڑھنا آسان نہیں۔۔۔عموماً  پی ایچ ڈی کے طلبہ ہی اس سے زیادہ مستفید ہو سکتے ہیں۔ تاہم سائنس اور دوسرے کئی موضوعات پر ایسے انتہائی معلوماتی بلاگز بھی موجود ہیں جن کا مواد اتنا مشکل نہیں اور ایک عام قاری بھی سمجھ سکتا ہے۔لیکن شوق اور مستقل پڑھتے رہنا شرط ہے۔

دوسری قسم میں عام موضوعات اور حالات حاضرہ پر مبنی بلاگز ہیں۔  لکھنے والوں میں عام لوگ بھی ہیں اور صحافی بھی۔ کئی صحافی حضرات تو سنا ہے کہ نام بدل کر لکھ رہے ہیں کہ جو بات وہ اپنے نشریاتی ادارے پر نہیں کہہ سکتے۔۔۔اپنے بلاگ پر کھل کر کہہ ڈالیں۔  یہ رواج عموماً مغرب میں ذیادہ ہے۔ عام لوگوں میں بعض تو کمال کے لکھاری ہیں۔ ان کے لکھے ہوئے پر آدمی بے اختیار کہہ اٹھتا ہے کہ۔۔۔ سبحان اللہ!۔۔۔ کیا پوٹینشل ہے!۔ انگریزی بلاگستان میں ایک جہانزیب ڈار ہیں جو پینسلوانیہ، امریکہ سے مسلمانوں کے حالات پر اظہار خیال فرماتے ہیں۔ ان کی نثر تو اپنی جگہ۔۔۔شاعری بھی کمال کی ہے۔ ان کی لکھی گئی ایک نعت رسول محمدﷺ پڑھ کر اندازہ ہوا کہ شاعری انگریزی میں بھی خوب کی جاتی ہے۔ پڑھ کر دیکھئے۔۔اگر آبدیدہ نہ ہوں تو بتائیے۔ جبکہ اپنے اردو بلاگستان میں ایک صاحب ہیں جن کا نام لینا مناسب نہیں کہ خوشامد کا شائبہ ہوتا ہے۔ موصوف کمال کے مزاح نگار ہیں۔ تاہم نئے لکھنے والوں کو میری نصیحت ہے کہ پہلے مہینے عارضی طور پر ان کے بلاگ سے پرہیز کریں کہ ایک تو ان کا شاندار بلاگ دیکھ کر دل گھٹتا ہے اور دوسرا ان کی تحریر پڑھتے ہوئے آدمی تیزی سے انکا رنگ پکڑنے لگتا ہے۔ اور بندہ پھر خوامخواہ ان کی "ٹرموں" میں "چولیں" مارنے لگتا ہے۔۔۔ (تسی سمجھ تے گئے او)۔ کسی دل جلے نے نام صیغئہ راز رکھنے کی شرط پر بتایا ہے کہ یہ لکھتے وکھتے کچھ نہیں۔۔۔بس ایک میراثی جن کا سایہ ہے۔ واللہ علم باالصواب۔

ایک ایسا دلچسپ بلاگ بھی میری نظر سے گزرا ہے جس میں ایک پاکستانی محترمہ اپنے لیے رشتہ تلاش کر رہی ہیں۔ رشتہ کی تلاش میں پیش آنے والے معاشرتی وسماجی مسائل اور اس سلسلہ میں اُن کی ہفتہ بھر کی کاوش ان کا موضوع سخن ہے۔ اُن کے بلاگ پر لکھے گئے ان کے تجزیے،  تجربات  اور معاملہ فہمی دیکھ کر لگتا ہی نہیں کہ موصوفہ پچیس برس کی ایک دوشیزہ ہیں۔ اگر آپ کو بھی رشتہ تلاش کرنے کے سلسلے میں کوئی مشورہ درکار ہے۔۔۔یا آپ اگر یہ جاننا چاہتے ہیں کہ اس سلسلے میں کونسی سائٹ بہتر ہے، نیز اس سلسلے میں کن باتوں کا خیال رکھا جانا لازمی ہے۔۔۔تو اِن کا بلاگ پڑھنا مت بھولئے۔۔۔کافی افاقہ ہوگا۔


تیسری قسم جس میں میرے جیسےمسکین شامل ہیں۔۔۔صلاحیت نہ ہونے کے باوجود لکھے جارہے ہیں۔۔۔کہ کونسے پیسے لگتے ہیں؟ تاہم ان لوگوں کو ناکام نہ سمجھیں۔ آتا جاتا چاہے کچھ نہ ہو۔۔۔کچھ نہ کچھ نکال ہی لیتے ہیں۔ انگریزی کا ایک ایسا بلاگ میری نظر سے گزر چکا ہے جس میں ایک خاتون بستر پر گزری رات بھر کی کارگزاری صُبح اپنے بلاگ پر چٹخارے لے لے کر بیان کرتی ہیں۔ بلاگ پڑھنے کی بجائے "منظر" چلنے کا احساس ہوتا ہے۔ کچھ "ناامید" قارئین کا الزام ہے کہ یہ رات دو بجے کے بعد کیبل پر چلنے والی فلموں کے منظر ہی ہیں جنہیں اپنے نام سے بیان کر رہی ہے ورنہ روز روز ایسے کام کون کرتا ہے؟۔۔۔  قارئین کی تعداد درجنوں میں ہے۔ اگر آپ کو پڑھنے کا شوق ہے تو Erotica کے ٹیگ پر سرچ مار لیں۔ لیکن اتنے تردّد کی کیا ضرورت ہے؟۔۔۔فلم ہی دیکھ لیں۔ ویسے شروع شروع میں مجھے یہ خیال لپکا۔۔۔کہ کیوں نہ یہ ڈرامہ میں بھی اردو بلاگ پر شروع کردوں؟۔۔۔نہ کوئی محنت۔۔نہ سوچنے کا تردّد۔۔۔الفاظ کی تھوڑی بہت تبدیلی کے ساتھ ایک ہی کہانی رگڑتے جاؤ۔۔۔کہ "بنیادی کام" تو بہرحال ایک ہی ہے۔ لیکن پھر خیال آیا کہ اردو میں تو یار لوگوں نے مَنٹو کو نہیں بخشا۔۔۔یہ تو پھر کُھلی بے غیرتی ہے۔


ایک مرنجاں مرنج ایسے بھی تھے جو لکھ کر بس خود ہی پڑھتے تھے۔ دوسال کے عرصہ میں ان کے بلاگ پر وارد ہونےوالا میں واحد قاری تھا۔ ان کی تحریر دیکھ کر کہنا پڑا کہ۔۔صاحب۔۔یہی کچھ لکھنا ہے۔۔۔اور لکھ کر خود ہی پڑھنا ہے تو کمپیوٹر پر لکھنے کی کیا ضرورت ہے؟۔۔۔کاپی پر لکھ لیں۔

ایک چوتھی قسم جو میں نے حال ہی میں دریافت کی ہے۔۔۔معدودے چند افراد پر مشتمل ہے۔ یہ لوگ لکھ رہے ہیں۔۔۔نہ "لکھ" رہے ہیں۔۔۔بس چھاپ رہے ہیں۔۔۔اور بڑی ڈھٹائی سے دھڑا دھڑ چھاپ رہے ہیں۔  ان کی پوسٹ پڑھ کر بندہ سوچ میں پڑ جاتا ہے کہ خبر تو پڑھ لی۔۔۔لیکن ان کی اپنی خیال آرائی کہاں ہے؟۔  ویسے ان کے چھاپنے سے مجھے تو کوئی تکلیف نہیں لیکن ایک مشورہ ہے۔۔۔کہ صاحب۔۔۔اتنے تردّد کی کیا ضرورت ہے؟۔۔۔لنک ہی مہیا کردیں۔ہم خود ہی پڑھ لیں گے۔

یہ تو تھی میری اب تک کی بکواس۔۔۔۔اردو بلاگستان پر زیادہ خیال آرائی نہیں کی کہ ایک تو خود جُمعہ جُمعہ آٹھ دن ہوئے لکھنا ، پڑھنا شروع کیا ہے۔ اور دوسرا سینئر بلاگرز سے پنگے لیتے ویسے ہی کچھ ڈر لگتا ہے کہ لینے کے دینے نہ پڑ جائیں۔ ویسے ایک بات مجھے سمجھ نہیں آئی۔ میں تو چار دن بمشکل ایک پوسٹ ہی لکھ پاتا ہوں۔۔۔اور کچھ یار لوگ ہیں کہ ایک دن میں چار چار پوسٹیں لکھ رہے ہیں۔ اُدھر پاکستان میں سُنا ہے کہ سولہ سولہ گھنٹے بتی نہیں آتی۔۔۔تو یہ کمپیوٹر اُنھوں نے کیا گیس پر کروا رکھا ہے؟۔  چلتے چلتے  بلال صاحب کے جادوئی کتابچے کا تذکرہ ضروری ہے۔۔کہ اگر یہ نہ ہوتا تو میں ابھی تک رومن اردو میں چیٹنگ میں ہی مصروف ہوتا۔ ویسے میری تحریر اسی قابل ہے۔

نوٹ:- اس پوسٹ میں میں نے حتیٰ المکان لکھنے والوں کی تعریف کی ہے۔ کسی کی دل آزاری میرا مقصد نہیں نہ ہی میری کوئی اوقات ہے۔ اگر کوئی اچھی چیز ملے تو اسے "چھاپنے" میں کوئی حرج نہیں۔ صرف اتنی گزارش تھی کہ اگر لکھنے والے کا اپنا تبصرہ بھی شامل ہو تو کیا ہی بات ہے۔ میرے الفاظ کو ہلکا پھلکا مذاق ہی سمجھا جائے۔ باقی اس اردو بلاگستان کی رونقیں آپ ہی کے دم سے ہیں۔