اردو میڈیم

"اردو میڈیم ای اوئے۔۔۔"

تضحیک آمیز انداز میں بولا گیا یہ فقرہ یا طعنہ ہمیشہ میرا پیچھا کرتا رہا ہے۔ اگر آپ اردو روانی سے بولتے ہیں اور اس میں دوسری زبانوں بِالخصوص انگریزی کی زیادہ ملاوٹ نہیں کرتے۔۔۔اور اپنی عام بول چال میں اچھی اردو لغت کا استعمال باکثرت کرلیتے ہیں تو آپ کو یہ فقرہ یقیناً سننے کو ملے گا۔  اگر مخاطب الکلام زیادہ بے تکلف نہیں تو مسکرا کر کہہ دے گا کہ آپ کافی "سخت" اردو بولتے ہیں۔ یہاں تک کہ میں تو "ہندوستوڑہ" بھی کہلایا جا چکا ہوں۔ مطلب کہ کچھ ہو جائے۔۔۔یار لوگ اردو میں خوش کلامی کی تعریف کے بجائے تمسخر ہی اُڑائیں گے۔۔۔ کہ جیسے بڑی شرمندگی کا کام کیا ہو۔ اگر انگریزی کے چند فقرے گاہے بگاہے گفتگو میں جوڑنا جانتے ہیں تو آپ کے پاس اسٹائل ہے  ورنہ آپ متوسط طبقے یعنی لوئر مڈل کلاس پینڈو ہیں۔۔۔انگریزی تو ایک طرف یہاں تو اردو میں پنجابی کی جوڑ توڑ بھی چلے گی۔ بشرطیکہ تمام گفتگو پنجابی میں نہ ہو۔

جب ایک عرصہ اردو میڈیم سرکاری سکولوں اور کالجوں میں گزارتے ہوئے گورنمٹ کالج لاہور پہنچے تو سب سے بڑا مسئلہ اسی اردو میڈیم لیبل سے جان چھڑانا تھا۔ کہ سفید شلوار قمیض زیبِ تن کئے مڈل کلاسئیے سے  اردو ہی کی اُمید تھی۔۔۔لیکن لال کوٹ اور ٹائی والے سے کچھ "بہتری" کی توقع تھی۔ ادھر گورنمٹ کالج میں فضا ہی الگ۔ ہر چیز کو زبردستی انگریزی رنگ دیا گیا تھا۔ وہ چیزیں جن کو اردو میں بہتر طریقے سے پیش کیا جا سکتا تھا۔۔۔وہاں بھی جان بُوجھ کر انگریزی کی قلعی کی گئی تھی۔۔۔یا یوں کہہ لیجئے کہ اردو سے زیادتی کی گئی تھی۔ "سوری!۔۔۔میری اردو زیادہ اچھی نہیں"۔۔۔دوران گفتگو یہ فقرہ عام سننے کو ملتا تھا ۔ ایک دو فنکار انگریزی لہجے میں پنجابی مارنے کی کوشش کرتے تھے۔ مقصد ان کا یہ تاثر دینا تھا۔۔کہ صاحب۔۔۔ہم تو فرنگیوں کے نطفے سے ہیں۔۔۔یہ اردو، پنجابی تو آپ لعنتیوں میں آ کر سیکھی ہے۔ کمرہ جماعت میں میں عموماً  تناؤ کا شکار رہتا تھا۔۔۔کہ سوال و جواب میں انگریزی کا استعمال قابلیت کی علامت تھی۔ غلط جواب انگریزی میں بھی کام دِکھا جاتا۔جبکہ اردو میں اختلاف کرنے سے قبل خیر منائیں۔  کئی ساتھیوں کو دیکھا۔۔۔کہ وہ اردو کا کوئی لفظ جان بُوجھ کر غلط بولتے پھر فوراً ہی اس کا انگریزی میں متبادل بول کر "انگلش میڈیم" ہونے کا تاثر دیتے تھے۔ ایک دفعہ تو انگریزی کا ایک لفظ صحیح طور پرسمجھ نہ سکنے پر کافی خفت اُٹھانا پڑی۔ ناگواری سے پوچھا گیا کہ کہاں سے آئے ہو؟۔۔۔گھگیاتے ہوئے عرض کی۔۔۔کہ صاحب۔۔۔لاہور ہی کا پینڈو ہوں۔ بس تربیت میں انگریزی کی ٹانگ توڑنے کی بجائے اردو سکھانے پر زور دیا گیا ہے۔۔۔ اور کوئی قصور نہیں۔ باقی ادھر تک پہنچ ہی گئے ہیں۔۔۔اردو سے بھی جان چھڑا لیں گے۔

نئے ہم  جماعت ہر دم انگریزی دانی سے چپکے رہتے۔ تعارف یا بات کا آغاز انگریزی میں کیا جاتا۔۔۔پھر اردو انگریزی کی ٹانگ توڑنے کا عمل شروع ہو جاتا۔ صاف اردو بولنے پر تبھی آتے جب تک مخاطب پہل نہ کرے۔ جس کی نوبت محال تھی۔ اردو تو چھوڑیے۔۔۔لاہور کے گردو نواح کے دیہات سے آئے لڑکے کہ جن کے پاس کھڑے ہو کر شک ہوتا تھا کہ مجیں دھو کر آئے ہیں۔۔۔ وہ تو پنجابی الفاظ سُن کر بھی حیران ہونے کی کوشش کرتے کہ یہ آپ نے کیا بولا؟۔۔۔ہمارے ہاں تو یہ نہیں چلتا۔  وہ بیچارے لاج رکھنے کے چکر میں پنجابی سے جان چُھڑانے کی کوشش میں لگے رہتے۔ یعنی جو انگریزی میں جتنا کمزور اور اپنی مادری زبانوں سے جتنا قریب تھا وہ اتنا ہی دباؤ کا شکار تھا۔ عجیب مصنوعی سا ماحول تھا۔

اردو کو رگیدنے کا یہ عمل میں نے نوے کی دہائی کے وسط سے دیکھنا شروع کیا۔ این ٹی ایم پر  نادیہ خان نئی آئی تھیں۔ مجھے یاد ہے کہ یار لوگ اس بات کو کافی دلچسپ محسوس کرتے کہ میزبان پاکستانی ہیں۔۔۔لیکن اردو پر دسترس تو درکنار عام بول چال کے الفاظ بھی صحیح ادا نہیں کر پاتیں۔ اُن کی اِن حرکات کو معصومیت اور اسٹائل گردانا جاتا۔۔۔جبکہ انگریزی بولنے کے ناطے۔۔۔ماڈرن ہونے کی دھاک الگ۔ اس عجیب نمونے کی مثال دنیا میں شائد ہی کہیں ملے۔۔۔کہ مہذب معاشروں میں زبان پر دسترس ذرائع ابلاغ پر آنے کے لئے بنیادی شرط ہے۔ لیکن جہاں ایک راہبر کے گن اس بات پر گائے جاتے رہے ہوں کہ وہ انگریزی اُردو سے اچھا بولتی ہٰیں۔۔۔تو وہاں سب چلتا ہے۔ حالات بگڑتے یہاں تک دیکھے۔۔۔ کہ ایک میزبان کو تمام پروگرام آدھا اردو انگریزی ٹانگ توڑ شکل میں اور باقی آدھا انگریزی میں کرتے دیکھا۔ منطق شائد یہ دی جاتی۔۔۔ کہ چونکہ لندن سے نشر ہو رہا ہے۔۔۔اس لئے دونوں طرف کھل کر ٹانگ چلائیں۔۔۔۔باوجود اس کے کہ پروگرام کلی طور پر اردو سمجھنے والے ناظرین ہی کے لئے تھا۔

اپنی مادری زبان پنجابی بولنے پر تو ویسے ہی منع کیا جاتا۔۔۔کہ گندے بچے بولتے ہیں۔ انگریزی اردو ٹانگ توڑ کی رِیت میں اردو بھی جاتی رہی۔اس پراگندہ ماحول میں اپنی زبان میں کچھ کرنے کی خواہش دباتے ہی رہے۔ باقی رہی انگریزی۔۔۔ تو جب تک پاکستان میں رہے کبھی نہ آئی۔۔۔کہ زبانیں۔۔۔۔ان کا حق ادا کرنے سے سیکھی جاتی ہیں۔۔۔ٹانگیں توڑنے سے نہیں۔

صاف اور خوبصورت اردو سننے کی اُمید تو اب کسی دیسی سے رکھنا عبث ہے۔ یہ کام بھی اب شائد کسی پردیسی ہی کو کرنا پڑے۔ اردو سُنئے۔۔۔جان ہینسن کی زبان سے:-



شاعری سے میرا لگاؤ تو"  بُنین میری پیندی نئیں " تک ہی محدود ہے۔۔۔جسے میں ایک عرصہ تک فیض کا کلام سمجھتا رہا۔ لیکن بہرحال جانے سے پہلے ایک پھُسپھسا سا شعر۔۔۔ جو کسی بھلے یا بُرے وقت تراشا گیا تھا۔ جیسی میری تحریر۔۔۔ ویسا میرا شعر۔۔

؎        اردو

مرا چہرہ ہے

اِس کا ترک ایسا

جیسے مرا چہرہ نوچ لیا

یہ شعر حضرت امام دین گجراتی رحمتہ اللہ علیہ کے ایک معتقد کے گوش گزار کیا گیا۔ سننے والے نے سنا۔۔۔کچھ سوچا۔۔۔سر کُھجایا۔۔۔اور پھر فرمایا کہ چہرہ تو میرا اپنا ہے۔۔۔اس کا میں جو جی چاہےکروں۔۔۔البتہ اردو کی لینے سے پرہیز کروں۔

نوٹ:-

۱) آخری جملے میں ایک "فحش" لفظ جو میرے لئے بہرحال فحش نہیں ہے۔۔۔ناگواری سے بچنے کے لئے حذف کیا گیا ہے۔

۲)   امام دین گجراتی پنجابی کے ایک "عظیم" شاعر تھے۔