تکلفات

فرانسیسی زبان میں اگر آپ مخاطب الکلام سے بے تکلف ہوں تو tu اور اگر تکلف ملحوظ خاطر رکھنا ہو تو vous کا ضمیر شخصی مستعمل ہے۔ اسی طرح، غائب، حاضر، بڑے، چھوٹے، مذکر و مونث کے لئے مختلف القابات اور اسما رائج الذبان ہیں۔  گویا انگریزی زبان کے برخلاف فرانسیسی زبان تکلفات اور کلام کی چاشنی سے بھرپور ہے۔ فرانسیسی اپنی زبان کی ان خصوصیات کی وجہ سے اسے بڑا اعلیٰ و ارفع جانتے ہیں۔ جہاں کہیں انگریزی اور فرانسیسی کا تقابل آجائے۔۔ان خواص پر فخر کرتے نہیں تھکتے۔ کچھ فرانسیسی اصحاب سے گفتگو کر کے اندازہ ہوا کہ وہ ایک خوش فہمی کا شکار تھے کہ صرف فرانسیسی زبان ہی ان خصوصیات میں یکتا ہے۔ بحث بڑھی تو عرض کیا۔۔صاحب۔۔آپ کی تہذیب اور زبان بہ لحاظ تہذیب اس معاملے میں ابھی طفل مکتب ہے۔ ہمارے ہاں نہ صرف یہ تمام آداب رائج ہیں بلکہ بات دوران کلام منہ بولے رشتوں تک جا پہنچتی ہے۔ اور تو اور۔۔۔گالی گلوچ کے معاملے میں اردو زبان کافی نرم واقع ہوئی ہے۔ مخاطب اردو میں گالی دے رہا ہو تو یوں لگتا ہے گویا پُچکار رہا ہو۔ گالی دینے اور نازیبا فقرے کسنے کے لئے لامحالہ دوسری علاقائی "کمتر زبانوں" کا سہارا لینا پڑتا ہے۔ پھر جا کر کہیں غصہ اُترے تو اُترے۔

زبان ظاہر ہے متعلقہ تہذیب کے مطابق ہی ڈھلتی ہے۔ اور جب تہذیب آداب و تکلفات۔۔چاہے وہ ظاہری ہی کیوں نہ ہوں۔۔سے لبریز ہو تو اس کے اثرات پوری طرح زبان پر بھی چھا جاتے ہیں۔ اکثر گھرانوں میں بڑے چھوٹے خواتین یا مرد حضرات کے ساتھ کوئی منہ بولا رشتہ قائم کئے بغیر ہم کلام ہونے کا رواج نہیں۔ ہم عمر کزن جنس مخالف کو "بات پکی" ہونے سےقبل آپی، بھائی پکارتے دیکھے ہیں۔ میں بذات خود اس بات کا قائل ہوں کہ مجھ سے سات آٹھ سال چھوٹے مجھے رو بہ رو کلام میں کسی لقب کے استعمال کے بنا نہ پکاریں۔ نہ ہی مجھے اپنے سے پانچ سالہ بڑے افرد کو محض نام سے پکارنے کی عادت ہے۔ رو بہ رو کلام میں تو یہ ٹھیک ہے بلکہ احسن ترین ہے۔ تاہم وقت کے ساتھ ساتھ یہ رواج کمزور پڑتا جا رہا ہے۔ اور کچھ بیبیاں اسے ناپسند کرنے لگی ہیں۔

زبانی کلام کی حد تک تو ٹھیک ہے۔ لیکن اب آئیے اردو بلاگنگ کی طرف کہ جہاں ان تکلفات کا بار اٹھانا پڑھ رہا ہے۔ میرا اپنا اردو بلاگنگ کرنے اور پڑھنے کا تجربہ و مشاہدہ کافی محدود ہے اس لئے کسی واضح موقف پر پہنچنے کی بجائے بذات خود تذبذب کا شکار ہوں۔ کچھ مثبت اثرات اپنی جگہ لیکن تہذیب اور زبان کے یہ بے جا تکلفات اردو بلاگنگ میں صحت مند بحث اور جامع تنقید پر قدغن لگاتے ہیں۔ اس کے برخلاف انگریزی بلاگستان میں رشتے صرف حلیف بحث یا حریف بحث تک ہی محدود ہیں۔ جس کے بدولت کسی مصنوعی ادب و آداب کو ملحوظ خاطر رکھے بغیر بحث و تنقید بلاجھجک آگے بڑھتی ہے۔ لیکن اردو بلاگنگ میں بات اس طرح نہیں کی جاسکتی۔ ایک آدھ بدتمیزوں کو الگ کردیں تو بات گالی گلوچ اور گھٹیا فقرے بازی تک نہیں پہنچتی۔ جو کہ اچھی بات ہے۔ لیکن ساتھ ہی ساتھ۔۔بحث وتمحیص کا سلسلہ بھی مہمل ہو جاتا ہے۔ بلاگروں کی قلیل تعداد کی وجہ سے ایک تو ویسے ہی کلوز کمیونٹی وجود میں آگئی ہے۔ جس کی وجہ سے منہ بولی رشتہ داریاں، دوستیاں اور تکلفات خود بخود فروغ پا رہے ہیں۔ اگر کسی موضوع پر اختلاف کرتے ہوئے تفصیلی بحث کرنے لگو تو تلخی ہوئے بنا  صورتحال انجام کو نہیں پہنچتی۔ کئی دفعہ تو یوں معلوم ہوتا ہے کہ یا تو اس دوستی اور احترام کا ڈھونگ جاری رکھیے۔ اور ساتھی بلاگر کی کسی بات پر اختلاف ہونے کے باوجود تفصیلی اختلاف رائے سے ہر ممکن گریز کریں۔ یا پھر بلاگنگ کی اصل روح یعنی اہل بلاگستان سے اختلاف اور مباحثہ کرنے پر آئیں۔ لیکن ساتھ ہی ساتھ اپنے پر کئی اقسام کے لیبل لگوا کر متنازع ہوجائیے۔ اگر شوخ بیاں ہیں اور طرز کلام مظبوط ہے تو پھر تو کچھ گزارا ہے نہیں تو تنہائی کا شکار ہونے کا خطرہ مول لے لیجئے۔

اس مسئلے سے جان چھڑانے کی ایک فطری صورت تو یہی ہے کہ جوں جوں بلاگستان کا حجم بڑھتا جائے گا توں توں یہ عناصر خودبخود کسی حد تک تحلیل ہوتے چلے جائیں گے۔ اور متنازع موضوعات چھیڑتے وقت اس بات کی فکر نہیں ہو گی کہ کون برا مناتا ہے یا کس چھوٹے بڑے، بزرگ یا خاتون سے ادب کی بوجھل حدود کے دائرے میں رہ کر بحث کرنی ہے۔ کہ اس وقت ہر رنگ ہر حلقہ بلاگستان میں موجود ہو گا۔ اور کسی ایک کو متنازع لیبل لگا کر دیوار سے لگانے کی گنجائش نہیں رہے گی۔