ہلالی سرکس

شہر ٹورنٹو میں حسب دستور آغاز رمضان پر پھر اختلاف ہے۔ ٹورنٹو ہلال کمیٹی والوں کو چاند نظر نہیں آسکا اور وہ رمضان جمعرات سے شروع کررہے ہیں۔ جبکہ شمالی امریکہ کی دو بڑی تنظیمیں ISNA اور ICNA جو حسابی کیلنڈر پر چلتے ہیں۔۔ ۔ بدھ سے ماہ رمضان شروع کرنے کا اعلان کیا ہے۔ صورتحال یہ ہے کہ ایک ہی شہر میں کچھ مساجد بدھ اور کچھ جمعرات کو رمضان کا آغاز کررہی ہے۔ اتنا ہی نہیں بلکہ کچھ پوپلزئی ایسے بھی ہے جو ان دونوں سے اختلاف کرتے ہوئے اپنی ورائٹی مارنے کے خواہاں ہیں۔ گویا ایک ہی شہر ٹورنٹو میں تین مختلف دنوں میں رمضان کا آغاز ہونا اور تین مختلف دنوں میں عید منانا کوئی اچنبھے کی بات نہیں۔
ISNA جو کہ براعظم شمالی امریکہ میں مسلمانوں کی سب سے بڑی نمائندہ تنظیم ہے۔ جدید آسٹرانومی اور حسابی کیلنڈر جیسے کافرانا علوم پر ایمان رکھتی ہے۔ ان کی سالانہ جنتریاں پہلے ہی سے طے شدہ ہیں جس کے مطابق اس سال رمضان ۱۱ اگست سے جبکہ عیدالفطر ۱۰ ستمبر کو منائی جائے گی۔ کچھ برس پہلے تک یہ کئی اقسام کے ڈرامے کرتے رہے ہیں۔ جس میں سب سے شاہکار ڈرامہ رات کے اڑھائی بجے میکسیکو کے کسی پنڈ سے چاند دریافت کرنا تھا۔ جب مشرقی ساحل والوں نے ان پر لعنت برسائی کہ بھائی جی۔۔۔پانچ ہزار کلومیٹر دور اور پانچ ٹائم زون پیچھے کے کسی علاقے کی شہادت پر ایمان لانا کونسی دانشمندی ہے؟ تب سے دلبرداشتہ ہوکر انھوں نے اپنا قبلہ قبلہ حقیقی کی طرف کرلیا۔ آجکل یہ حضرات مکہ مکرمہ میں نکلنے والا چاند حسابی طریقے سے دریافت کرتے ہیں۔ گویا زمین شمالی امریکہ کی۔۔اور افق صحرائے عرب کا۔ یہ کونسی افلاطونی ہے ۔۔۔بلاگراعظم ابھی تک سمجھنے سے قاصر ہے۔ لیکن چونکہ فدوی جدیدیت کا قائل ہے اسے لئے چاروناچار مسلمانوں کے سب سے بڑے جتھے کے ساتھ سائنسی طریقہ کار پر چلنے پہ مجبور ہے۔
ICNA براعظم شمالی امریکہ میں مسلمانوں کی دوسری بڑی نوٹنکی ہے۔ اس تنظیم کی اکثریت دیسیوں پر مشتمل ہے۔ ان صاحبان نے پچھلے کچھ برسوں میں ایسی ایسی فنکاری دیکھائی ہے کہ جس کی تاریخ مسلمانان شمالی امریکہ میں مثال نہیں ملتی۔ ٹی وی ریڈیو پر ان ارسطوؤں کے انٹرویو اور مساجد میں خطبات اپنی مثال آپ ہیں۔ غالبا پچھلے برس تک یہ حضرات چاند ننگی آنکھ سے دیکھنے کے قائل تھے۔ لیکن چونکہ ننگی آنکھ میں بھی کچھ نا کچھ ننگا ہے اس لئے ان حضرات نے اس فحش طریقہ سے تائب ہوکر نئی درفطنی ماری ہے۔ ملاحضہ فرمائیے چاند کے بارے میں ان کی تازہ چول۔۔

ICNA Canada adopted a balanced approach which is using calculation as a support and very exact means to forecast earlier, but when Hadith is asking us to see the moon, so we added the word " sighting " with calculation. So we benefit from calculation and same time we follow the tradition of seeing the moon. In this way, we are choosing global moon sighting, instead of local sighting, and both are fiqh based ways of moon sighting.
It is sure that when it is determined that moon will be visible on such date it will be seen some where in world. It will be a rare situation that it is said so but not seen any where so we will stick with seeing and not calculation. But such possibility is around 5 to 10 %

اوپر دی گئی انگریزی سے متاثر ہونے کی قطعاً ضرورت نہیں۔ اس افلاطونی کی عملی حقیقت میں آپ کو اردو پنجابی میں سمجھا دیتا ہوں۔
یہ جغادری دراصل خربوزے کو ہدوانے کا اسٹکر لگا کر بیچ رہے ہیں۔ پیروی یہ اُسی حسابی طریقہ کی کررہے ہیں۔ لیکن چونکہ سنت نبوی کا شیرہ لگانا ضروری ہے لہذا استدلال یہ ہے کہ "سجنوں نے چن کہیں تو دیکھا ہوگا!"۔ اب فرض کریں کہ بلاگر اعظم ادھر بیٹھ کر یہ اعلان کردیتا ہے کہ اُس نے چاند بحرمنجمد شمالی کے کسی نکرے میں دیکھا ہے تو کون مائی کا لال اس شہادت کی تصدیق کرنے جارہا ہے؟ باقی رہے نمبر تو ان کا راز جاننے کے لئے santa is dead والی وائرل ای میل سے رجوع کریں۔
تیسری قسم کے شعبدہ باز ٹورنٹو ہلال کمیٹی والے ہیں۔ ان کی رِیت پسندی کا عالم یہ ہے کہ اگر بس چلے تو سحری کے وقت ٹین کے ڈبے کھڑکانا شروع کردیں۔ یہ حضرات ٹورنٹو کی ایک مرکزی مسجد میں چار گھنٹے اجلاس کرنے کے باوجود کوئی بھی چن چڑھانے میں ناکام رہے ہیں۔ اس لئے ان کا روزہ وکھرا ہے۔ چن دیکھنے کے لئے یہ نظر کی عینک کو بھی غیر شرعی گردانتے ہیں۔
چوتھی قسم میں ہر بندہ مفتی اعظم ہے۔ ایسے ایسے دلائل سننے میں آئیں گے کہ بس۔ ان میں کچھ شیدائی ایسے ہیں جو عید ، روزہ اپنے آبائی وطن کے ساتھ رکھتے ہیں۔ بندہ اگر پوچھے کہ صاحبان۔۔۔کیا آپ نماز بھی اپنے وطن کے ساعت میں پڑھتے ہیں تو آگے سے کھی کھی کرنے لگتے ہیں۔ میرے پچھلے محلے میں ایک مسجد تھی۔ جو روزہ اور عید الفطر تو ہلال کمیٹی کے ساتھ مناتے تھے۔ جبکہ بقر عید کے لئے سعودی افق۔ باقی سال کسی مایا کیلنڈر کی پیروی کرتے تھے۔
عام بندہ فیصلہ نہیں کرپاتا کہ کیا کرنا ہے۔ کئی لوگ اپنی قریبی مسجد کے ساتھ چل پڑتے ہیں کہ تراویح اور نماز وغیرہ کی ترتیب برقرار رہے۔ کچھ لوگ اپنے خاندان سے اتفاق کرلیتے ہیں۔ تاکہ عید ملن پالٹیاں نہ بگڑیں۔ ورنہ سلام دعا کے بعد ایک دوسرے سے یہی پوچھتے رہو کہ ہاں بھئی۔۔کتنواں روزہ ہے اور کب عید کررہے ہو؟